أولاًكيفارا, انا ما بحب ريحة الدخان, لا بقى تدخن بالقهوة :mrgreen:

وتانياً: شوهي الأخبار اليوم بحارة كوليلك..... صارلي زمان ما جيت لهون

ثالثاً: لازم مانجي عالقهوة برمضان إلى بعد الإفطار :wink:

هلا اخي بلند .... :)

اولا اخي العزيز لو انتبهت في لوحة مكتوبة باعلى المدخل اللي دخلت منه ,,, مكتوب عليها // قسم المدخنين // :wink:

ثانيا : هاي سيكارة كوبية وريحتها احلى من العطر ... :!:

وبالنسبة لحارة كوليلك بصراحة اخي كل واحد بيغني على ليلاه او على كوليلكتوه ...

ما حدى فاضي لحدى ... بس الامور بخير الحمد لله .. وكل الاخوة عم يؤدو واجبهم وما حدا مقصر ..

بس والله كنا مستفقدينك انت والشباب .. انشغل بالنا عليكم ...

وبالنسبة الجية لرمضان احنا مساوين برنامج خاص للمقهى برمضان .. :wink:

وهلا انت طمنا شو اخر الاخبار عندكم ..؟؟

وهي رح طفيلك السيكارة مشان ما تنزعج .. :wink: :wink: .

مرحبا ؟

كيفكون ؟
اليوم الشباب والصبايا معزومين على حسابي لانو قبضنا الراتب اذا ماعندك مانع معلم كيفارا:wink:
بصراحة ما فيني إلا ما مر وسلم ... وحتى لو مافي حدا .. مو مشكلة بعقد شوي برتاح بفكر مع فنجان القهوة أو متل ماقال كيفارا كاسة شاي بس مشان نكسر الروتين
على فكرة كيفارا هاي الصور كتير رايقة لازم نعلقها بصدر المقهى شو رأيك ؟ لانو عاطية احساس كتير هادي وغريب :wink:
:wink: :wink:

هلا والله بنسرين

كيفك شو اخبار الشعر والخواطر هل اليومين ...؟؟

يا ستي عم تنوري المقهى بوجودك .. واذا كان الطلبات على حسابك هلا بساوي اعلان بالقسم .. لانه الشباب مفلسين هل اليومين لانه اخر الشهر وفي منن بيتاخر رواتبهم . ..... :?

وبالنسبة للصورة .. خايف اذا حطيتها بالمقهى الادارة تساويلنا مشكلة طويلة عريضة ... وندخل بمتاهات احنا بغنى عنها ... مع اني برتاح كثير مع الصورة .. :cry: :cry:

صحيح شو رايك نساوي عندك بالقسم مسابقة شعرية او تحدي .. لانه في عدنا مبدعين بالكلام .. قصدي بالشعر ؟؟ :?: :arrow:

وهلا اشربي كاسة الشاي لانها رح تبرد :arrow:

وانا بطلبلي كاسة تانية باعتبار الطلبات على حسابك :wink: :wink:

ولا يهمك حط الإعلان وتكرم عينك 8)

بالنسبة للصورة ما في مشكلة لانو ما عم تقرا كل اليوم اللافتة الطويلة العريضة Be Free :wink: يعني المعلم الكبير عنا بالموقع / MAS / ديمقراطي لأبعد درجة :mrgreen: :wink:
وما بخفيك بعد ما شفت هالنشاط عندك بالقسم والمسابقات فكرت اعمل نفس الشي :oops: بس ترددت كيف رح تكون المسابقة عندي .. يعني عم فكر فيها وعلى كلن راح استشيرك اذا عجزنا :wink:
وألف صحة على كاسة الشاي ..
شايفة الجماعة كتير مبسوطين 8O 8) لكان مو على حسابون على حساب الحكومة :evil: :wink:
بااااي

السلام عليكم ...كيفكم يا رجال :twisted:

لكان ياعمي الراتب لنسرين :D وبلند شنق حالو :(

بس انشالله يكفي الراتب أجور المواصلات :lol: :lol: مشان تجي عالقهوة كل يوم 8)

صحيح, والله لازم نعمل مسابقة بقسم الشعر, ماشالله الشعراء كتار... :wink:

بس كيف...فكروا معي بالطريقة :roll:

كل ما عم فوت عالقهى عم لاقيه فاضي

شو اخ كيفارا مبين عليك مليت من القعدة بالمقهى بعد ما عودتنا

وينكن ما عم شوف حدا .......حتى ما في شي موضوع جديد :evil: 8O

ملينا هاااا :| :x

مبين راح بطل القعدة بالمقهى

السلام عليـــــــــكم

مرحبا كيفكم يا جماعةة

حابة اكون وحدة منكم بالمقهى اذا مافيها ثقلة

صحيح كنت معارضة بالاول للفكرة :( :(

بس ماكنت بعرف انو تصير مقهى عالمي

وهلاء في كراسي فاضية ولا ارجع :cry:

سلام

يا عالم ياهو أنا لحالي بالمقهي

شو أنا متأخر ولا في شي تاني :cry:

أخونا العزيز كيفارا لاقيلنا حل لهل القهوة (مافي زباين) :P

أنا عندي أقتراح رح أطرحو عليك شو رأيك تحدد دوام للقهوه أي ساعات محدده للمناقشة بس يارية المسا

هلا نسرين ...

يا ستي وهاي حطينا الصورة على مسؤليتك :wink: لاني والله صاير خاف من الديمقراطية :cry: :cry: :cry:

وشوفي اذا مكانها كويس هيك ... :| ولا نغيرها :?:

وبالنسبة للمسابقة هاي الاخ بلند كمان مؤيد للفكرة شو رايكم انه يكون تحدي بين الشباب والبنات (( لانه ما نقدر نقسمهم الا هيك )) مع انه الشباب خسارنين بهل الحالة ... :cry:

ويكون السباق على اساس التحاور يعني بيكتب الشباب او البنات بيت من الشعر او عدة ابيات ويرد عليهم الفريق التاني ببيت او بيوت مضادة للمعنى او موافقة لها حسب الرغبة ....

شايفة نسرين اليوم المقهى مليان ... كل هذا ولسا ما حطيت اعلان انه الطلبات على حسابك :wink: بس ما شالله الاعضاء بيشمو هيك اخبار على الطاير .. :wink: :wink: :wink:

اخي بلند جاي دورك كمان بس تستلم الراتب بيكون الطلبات على حساب سموك الكريم :roll: :wink: :)

شو رايك بفكرة المسابقة قولتك بيمشي حالها ولا ندور على شي فكرة تانية ..؟؟

هيما شبك ....

تركتي كل المقهى وقاعدة بالقسم اللي فيه صيانه ...!!!!!

لا وعم تقول ما في حدى ... ما شايفة الضجة اللي حواليكي .. ميسي هلكنا بصوت المسجلة وهجار شغلته يقلب بالقنوات ما عم يهدى ..
والجي ما شالله عليه ما عم يهدى موبايلو ... ونسرين متنقلة من بيت شعر لخاطرة ... وريبر شايل هل الابرة وداير بين الشباب .. وهفند متخبي هو وجماعة الادارة عم يلعبوا شدة ... ونورا ولورين والبنات كلن .. مجمعين اربع طاولات وعم يفكرا بسؤال صعب ليحطوه بقسم احداث تاريخية

وباقي الشباب عم يلعبو .. شطرنج .. واتاري ... وصرعونا بطاولة الزهر :(

كل هدول وانتي قاعدة لحالك ... :evil: :evil: :evil: :!: :!: :!: :?: :?:

هلا والله بنورا يا ستي البيت بيتك .... على فكرة يمكن محجوز لالك كراسي بل VIP :wink: :wink:

هلا حبيبي اكرم ...

لك يازلمية هلا كنا عم نحكي على هيما انت كمان وين فايت ..

ادخل على ايدك اليمين اول دخلة على اليسار .. بتشوفنا قاعدين ...
واطلب على كيفك الطلبات على حساب نسرين اليوم ... :wink: :wink:

تركتي كل المقهى وقاعدة بالقسم اللي فيه صيانه ...!!!!!

8O 8O صيانة ........مقهى وصيانة 8O

عندك شغلات غريبة بالمقهى

اذا صاحب المقهى ما عد يقعد بمقهاه نحن ايش مودينا

ولا انا غلطانة يا كيفارا :evil: :evil:

هلا هيما ..

قصدي بالصيانه عم نساوي ديكور للمقهى ... :wink:

على كل حال تفضلي كاسة الشاي واعطينا رايك بالمسابقة اللي رح نساويها بمنتدى الشعر والخواطر ...؟؟

واذا عندك فكرة ممكن تحكيلنا ياها .. والطلبات اليوم على حساب الاخ ريبر .. :) :roll:

لانه نسرين فلست مبارح وهي عم تدفع فواتير الزوار .. :wink:

يا ستي دايما بنسى كاسة الشاي وتبرد بدون ما اشربها سخنة ... :evil: :evil:

ونحن اخ كيفارا مالنا كاسة :cry:

طيب وهلا شو هي المسابقة يلي بتحكو عنها

بتعرف اخ كيفارا كاسة هالشيمبين عليها حلوة زيادة

المهم تنشوف هالمسابقة الجديدة . ....

أنااا رايح لقسم الشعر

BY

حبيبي ميسي انت بنعطيك كاسة شربات :!:

المسابقة لسا ما سويناها بس عم نتناقش فيها .. ان شالله قريبا رح تبدا واتوقع تكون حلوة كثير ...

احلى من مسابقة منتزه المنوعات :cry: :cry:

انت شوف الردود الماضية بتعرف المسابقة واعطينا رايك بالموضوع ؟؟

كمان بردت كاسة الشاي تبعي :evil: :evil: :evil:

OK أخ كيفارا. .. ... .عندي فكرة ناقشوها

المسابقة :

عنوانة تتكون ( أطول قصيدة بالعالم) راح نحطم رقم غنيس للأرقام القياسية فيها

يعني المبدأ تيكون

1- الموضوع مثبت (مافي مجال . .. من نسرين) :roll:

2- الشعر ما بيكون فيه ردود شكر . ... (طبعاً من صاحب الموضوع) فقط أكمال.

3- العضو يلي بيجي راح يكمل القصيدة بأكتر من ست أبيات (بشرط ان تكون نثرية أو قصصية بشكل أدبي وقصائدي)

4- عند ملاحظة شيء أو خلل ضمن الموضوع لا يرجى كتابة رد وحيد بل أكمال النثر أو الشعر وبعد ذلك خط صغير وبعدين ملاحظة : ويكتب شو هي . .. .

5 ــــــــــــــــــــــ>>>>>>>> كملوهااااا عني شوي

وإذا حدا عندو فكرة تانية يطرحها هااااااا

:lol: :lol: :lol: عقبالنا أخي كيفارا عقبالنااا

نسيت أقلكن :mrgreen:

وبس تنتهي القصيدة بعد شهرين أو تلت شهور

راح نشوف مين أكتر واحد بيتجاوب بشكل راقي مع الموضوع دون أنقطااااع
ـــــــــــــــــــــــ

ناقشوه وإذا خلصتو

عطوني علم مشان إذا بدكن أنااا بنزلوو :idea:

يلااااا ما في حدا هون بالقهوة. ... .. ..لازملا كم دعاية والله هالقهوة وكم عرض خاص
من هدول عروض MTN :wink:

تعالو قبل ما يبرد الشاااااي :lol:

السلام عليكم :wink:

ما تزعلوا مني اليوم مريت من عند المقهى بس ماقدرت سلم ..عملت حالي مو شايفة :mrgreen:
وهاي رجعتي :wink:
انتو ما بيستغنى عنكم :oops: 8) :wink:

قبل ما بلش بدي ابدي اعجابي واشكر كيفارا على تواصلوا السريع معنا باسلوب كتير خفيف وحلو ومنسق :wink: يعني القهوة ماشية مظبوووط والزبايت عم يكتروا وحتى عم شوف اخوانا السواح كمان 8O :lol: والظاهر المعلم كيفارا رح يطالع منيح من ورا هالمقهى :wink:

وقبل ما اطلب فنجان القهوة بدي سلم على زميلنا ميسي لانو من زمان ما شفتو :roll: :wink: وبلند اكيد :wink:
و كل الصبايا والشباب الحلوين :oops: :wink:
عم تنورا المقهى والمقهى منور كوليلك بصراحة ..

بالنسبة لمسابقة الشعر .. شكراً لكل هالدعاية كيفارا ويسلموو ميسي على اقتراحك بس انا ما بدي تكون المسابقة عبارة عن ابيات شعر قصدي يعني كلو يكون نسخ ونقل من هون وهون :( بدي شي يكون فيو ابداع مع تسلية وتكون خفيفة عالمعدة :wink:

المشكلة مخي مالو فاضي هالايام لانو عندي امتحانات :wink:
بس هلا خطرتلي فكرة 8O

1- بدي اطلب اجمل بيت او خاطرة تكون جديدة جديدة ومن ابداع صاحبو حول كلمة او موضوع او فكرة انا بقترحها ؟
يعني بقول مثلاً عن ( الخالق/الطبيعة/الحبيب/ الوطن ..الخ ..)؟؟
2- ونحدد عد الاشتراكات كل عضو الو مرة وحدة
3- وعدد الاشتراكات ل /50/ منيح؟
وبعدين راح نعلن اجمل اشتراك من خلال لجنة سرية :wink: والرابح الو جائزة اكيد بس بعد ماقررتها :wink:
شوو رأيك ؟؟؟
طولت ونشف ريقي :?

السلام عليكم

كيفكون ان شاء الله تمام والله فكرة حلوة كتير انو يصير عنا بكوليلك مقهى شكرا كتير معلم كيفارا عالفكرة

اوكي انا اليوم اجيت بس مشان اسلم عليكون وبدي فنجان قهوة سادةةة

أشتقت لارتشاف القهوة هنا مع هذيان قلمي الذي أجده يعشق الثرثرة :mrgreen:

و طبعا مابشربها سادة الا بحالتين لما بكون عم انتظر نتائجي بالامتحانات :mrgreen:

او لما بكتب خربشات هون وهون :mrgreen:

اصلا خليها تكون مرة ما بتفرق متل مرارة الحياة :mrgreen: وطبعا على حساب نسرين لانو هي عزمتني هااا :lol: :mrgreen: اوكي نسرين

و نكهة القهوة بتحلى بحضوركم ما هيك :wink:

وبدي اشكركم على موضوع الروتين يا ريت كنتو طولت كمان عن هالموضوع موضوع الروتين الملل :evil: :evil:

والي عودة من بعد اذنكم :lol:

سلااااام

ألف مبروك افتتاح المقهى ... فكرة رائعة جداً .... :wink:

أحم أحم ...

لك كنت عم تقل حالي عليكم قلت بيجوز يعزمني شي عضو على فنجان قهوة او كاسة مي ...

بس للأسف نشف ريقي وما حد عزمني ...

ههه... :wink:

لي عودة .

شو الموضوع

شو في هون

ليش هالتجمعات

حدا يفهمني شو الموضوع

لانو بصراحة بدي شي ساعتين لحتى اقرا هالخمس صفحات

حدا يتبرع و يشرحلي بشكل مختصر

الظاهر في شي حلو عم تعملوه متل العادة

على كلا يعطيعكم العافية جميعا و شكر خاص لـ كيفارا, المبدع

هلا نسرين ...

يا ستي بالنسبة للمسابقة انتي فصلي ونحن بنخيط ... :wink:

فكرة حلوة بصراحة ... بانتضار اشارة البدئ منك

بس بالنسبة للجنة السرية رح تعلنوا اسمائها :roll: :wink: :oops: باعتبارها سرية ....

اهلين اخي ساز ...

نورت المقهى بطلتك الحلوة ... يعني لو ما نسرين عزمتك ما كنت جيت ؟؟!!!

وبالنسبة لموضوع الروتين تقدر تفتحو ايمتى ما بدك ... بس رح نعطيك قهوة سكر زيادة لما تفتح الموضوع لحتى نكسر روتينك ... :wink:

اخي qamishlo31 الله يبارك فيك ...

حقك علينا اخي العزيز بس والله ما بعتنا دعوة لاي شخص من الحارة (( حارة كوليلك ))

لانه اذا بترجع على الافتتاح كاتبين بالاعلان انه الدعوة عامة ... :wink:

على كلا تعال انت معزم اليوم على حسابي :cry:

اوف اوف ...كالعادة :cry: برد الشاي وانا عم بحكي معكم :?

هلا والله بالاخ العزيز ماس ... :)

يا زلمية والله خجلانين منك .. ما قمنا بالواجب :oops: :oops:

على حظي جيت وانا كنت برى عم ساوي دعاية لمسابقة نسرين ... :cry:

الموضوع باختصار اخي العزيز .... متل ما شفت بجولتك السريعة .. يعني مقهى عائلي اجتماعي بسيط :oops:

وعلى فكرة كان من المفروض انك تفتتح المقهى بس كنت بوقتها ملاحق من الاعضاء ( في الطريق الى مقابلة ماس ) وخفت اسببلك مشكلة لانه الاعضاء كلهم كانو موجودين واولهم ميسي .. وتعرف شو كان رح يصير فيك اذا كنت موجود ....

شكرا اخي ماس

انا اختك مو اخوك

اسمي اسم بنات مو شباب :evil: :cry:

اوكي ولا يهمك رح فكر بشي موضوع حلو 8) :roll:

الي عودة باذن الله

انا اختك مو اخوك

اسمي اسم بنات مو شباب :evil: :cry:

:oops: :oops: :oops: :oops:

اسف كثير ... مبين صار لازم ركب نظارات .. :cry: :(

الى اللقاء :wink:

حبيبي ميسي ...

والله ما كنت شايفك ليش قاعد بعيد تعال هون ياخي..... و مبين عليك مستني تلفون !!!؟؟؟

شو اخي بدك تساوي اطول قصيدة ... والله مو غلط ...بس ياخي اذا اجى واحد جديد بدو يرجع شهرين لورى لحتى يقدر ينهي القصيدة ... !!! :? :cry:

بحكيلكم شغلة بخصوص الوقت ....

انا حاسس انه الاوقات بتمر بسرعة كبيرة كثير ...!!! تعرفوا احيانا ما بحس الا واحنا صرنا بيوم الجمعة ... !!! وفجأة بلاقي انه نحن بشهر جديد ... وصدقوني يتمر سنة كاملة وما بنحس فيها .. كانها شهرين تلاتة .. معقول انه الزمن صار اسرع ولا نحنا اللي تاخرنا عن الزمن؟؟؟

انتو عدكم نفس الشعور هذا ولا انا مريض .. :cry: :cry: :cry: ؟؟؟؟

يالله كلما بقول هل المرة بشرب الشاي سخن بيطلعلي موضوع و بنسى الشاي :evil: :evil: :evil:

مسا الخير ... :cry:

أفضل شي أقعدلي هون بالمقهى شوي ... أشربلي كاسة حليب ونام :D ...

لأنو :( :( صرلي نص ساعة بالمنتدى بدي اكتب شي رد ما فيني ... 8O

بتعرفو لشو ... لأني بطلت الدخان :oops: .

بمعيتكم شوفولي حل لهل المشكلة :roll:

أوعا تخبروني أنو حل المشكلة هو أني أرجع للدخان ها ... أوكي :wink: حبايبي ...

تصبحون على خير .

أى أخي كيفارا والله والوقت متلل الطلقة :mrgreen:

ما تحس عليه بالمرة. .. وخاصة الأوقات الحلوة :oops:

ــــــــــــــ

ومشان المسابقة ما فهمت من نسرين شي ... .. :oops:

نسرين ممكن بس بطريقة تانية تكتبي الفكرة. . :oops:

أى أخ كيفارا برد الشاي تبعك مااا :twisted: :twisted: :twisted:

لأنو ما تلحق من هالطاولة لهل الطاولة. ... . .. . :lol:

طيب بدي أشرب كاسة هاقهوة قبل ما تبرد

على فكرة أخ كيفارا ... ... أنت شو قهوتك. .. .. .أناا وسط هااااااا

يلاااا سباب. .. ..راجعلكن والله

اهلين اخي قامشلو ..

تعلاف شو هو الحل .. جيب سيكارة وحطها امامك وقوللها يا انا يا انتي :evil: :evil:
بعدين جيب سكين كبيرة واقطعها .. الى نصين .. واعلن انتصارك .. انا الفائز :)

يا سيدي احسن شي سويتو انك تركت التدخين ... على فكرة لا تغرك الصورة انا ما بدخن ولا بحب التدخين .. بس شايل هل السيكار من سنة لسا ما خلصتها .. :wink:

هلا حبيبي ميسي ...

يعني العلة مانا مني انت كمان حاسس هيك بالوقت !!! :)

برايك شو السبب اخي ميسي ... ليش صار الوقت مثل الطلقة على قولتك ؟؟؟؟

السبب بالوقت ولا فينا احنا ؟؟ :arrow:

بالنسبة للمسابقة .. يمكن نسرين تتاخر اليوم لانه في عنده ضيوف
وهي رح تخبرك بالتفاصيل ...

يا سيدي انا قهوتي احب اشربها بدون سكر ...

شكرا على القهوة بس ان شالله ما ينفتح شي موضوع وتبرد القهوة وما اشربها سخنة ... :cry: :cry: :cry:

صباح الخير ..

والله ميسي عصبني شوي :evil: :mrgreen:
بس يلا بتموووون 8)

وحدا يتبرع ويعيد صياغة الحكاية :wink:

على كلن المسابقة رح نزلها بقسم الشعر يوم الثلاثاء ان شاء الله ورح وضحها كتير متل الشمس بعز الصيف :wink:

وعنا خبرية حلوة وجاينا اعضاء من وجهاء الموقع :wink:

أكيد عرفتو مين

كيفك qamishlo
وهلا فينا نقلك الحمد الله على السلامة و العقدة معك احلى بعد ما تركت هالدخان يلي ما منو فايدة غير وجع الراس والجيبة :wink:
والحل قريت بالنيت قبل كم يوم انو البرتقال مفيد كتير بينسيك الدخان ..وكمان خلي جيبتك ملاينة بشغلات بتقرمش وسكاكر الخ :wink:
عن جد عم بحكي لا تضحكوا على حكي :(

وانا بحسد كتير كيفارا على موضوع الوقت بصراحة انا ما عم حس باليوم والشهور و.. بس عم حس كتير بالساعات والله احيانا بقول رح امسك هالساعة جعلكها على كيفي 8O :wink: بس هاي لما بكون عم بستنى شي وياما عم بتصير معي :cry:

يا ريت تكون قهوتي هالمرة ســــــادة على قولة الغالية Saze

وأكيد عرفتو ليش :cry: :wink:

يالله هلا عرفت ليش اليوم حاسس بملل وبحس الوقت تقيل .. :evil: :evil: :evil:

يعني ما شفتي حدا غيري تحسديه نسرين .. :evil: :evil:

يمكن يكون في عندك اوقات فراغ كثير نسرين !!! ما هيك ؟؟

ميسي حبيبي ليش عم تعصب الانسة نسرين ... ؟؟؟ حدا بيسال هيك سؤال ... :wink: :wink: :wink: ...بصراحة انا معك بالسؤال بس لا تخبر نسرين :oops:

على فكرة انا حاولت اسال الكثير من اللي بعرفهم وطلع الاحساس تقريبا متشابه وعام .. انه الوقت بيمر بسرعة وبدون ما نشعر ...

بس ايش هي الاسباب هون بيصير الاختلاف بوجهات النظر .. البعض بيقول هذه من علامات الصغرى لنهايات الكون ..!! :cry: :cry:

والبعض بيقول هذا شي طبيعي نتيجة التطور والتقنيات الحديثة ... :)

والبعض ماهامه موضوع الزمن وما بيشغل مخه بالتفكير .!!! :?

انتو شو رايكم بالموضوع او بالاسباب ؟؟؟؟؟

يالله برد فنجان القهوة يا ميسي :cry: :cry: :cry:

طابَ وقتكم

بدي أطلب كوب من الحليب لو سمحتو , خليه حار ها كيفارا أحسن ما أشكيك للتموين خيو :P .
حبوبي كيفارا , ولا يهمك سيجارتك رح تخلص شي يوم ما هيك :wink: .
ومشان تقطيع السيجارة لا لو سامحني هالمرة لأنو ما بحب التبذير رح أعطيها لأخوي ليدخنها بدالي هههه :lol: :) .

وي هلا نسرين , طمنيني عنك , بتمنى تكوني بخير .
نسرين , العقدة معي بتكون أحلى بعدما تركت الدخان :roll: أمممممممممم :roll: ,أها جديد فهمت قصدك القعدة ما هيك :oops: .
عن جد آسف لما حرقت فستانك بسيجارتي هديك المرة , ما كنت منتبه لي بتعرفي ما بيهدالنا بال من المشاكل والديون :cry: :cry: .
بشكرك على الوصفة نسرين , ما عم أتذكر الدخان الا وقت بدي أكتب أو اسمع أحمد قايا :cry: .
صحيح نسرين نسيت شربك كوب حليب , ماشي بدك تتحملنا كيفارا نزل كاسة حليب لنسرين على حسابي :P :wink: مفلس أنا هلا حبوبي كيفارا رح أدفعلك ياها بعد ما استلم جائزة المسابقة ,أوكي حبيبي :wink: .

يسلمو عالحليب حبوبي كيفارا .

واحد شاي يا ولد

والمشاريب اليوم على حسابي

الا مشروب ميسي هو رح يدفع من جيبو

ونزل كمان كاسة حليب لعمك قامشلو

وخد باقة نعنع لنسرين على قاعة الامتحان لان النعنع بيفيد بالذكاء

يلا أحط

وعم نستنى المسابقة

مساء الخير

كيف الشباب

مالي مطول كتير بالقهوة :lol: بس حبيت سلم

وقول لنسرين حاجة تجي لهون, مبين مو ناوية تنجحي بالامتحان :evil:

انا رايح ادرس :lol:

باي

مساء الخير ...

أولاً بدي سلم على جميع الموجودين بالقهوة :P , لك يسلمو كتير كتير حبيبي هجار على كاسة الحليب :oops: .

**

صحيح حبوبي كيفارا عن جد سامحني لأني بالمرة الماضية نسيت جيب هدية لأفتتاح المقهى , هاي جبتلكم هدية بتمنى تنال أعجابكم , هديتي هي ساعة بلا عقارب !! :wink: :roll: بدي ياك تعلقها بالحيط أوكي حبي .

عن جد كيفارا كمان الخدمة بالمقهى المسويات سيئة , بدنا ياكم تداوموا دوام مسائي كمان ...ههه :wink: :wink: .

تصبحو على خير . :idea:

وينكن يا جماعة ليش ما في حدا ما عم تشبعو نوم

عم تضيعو ربع عمركن بالنوم لاووو

قومو اشربو قهوة واصحوو

عطونا مواضيع نتناقش فيها لو

وي صح النوم حبيبي هجار :roll: , عن جد ملينا لو , يلا المسويات رح تكون الخدمة الذاتية :idea: لبينما كيفارا يلاقيلنا حل لهل المشكلة أمرنا لله :arrow: .

أنا بدي ساويلي كاسة حليب ,لأنو أنا مدمن عالحليب بعدما تركت الدخان .

أوكي أنا ناطرك لتخلص كاسة الشاي تبعك .

ما شي حبي .

واحد شاي يا ولد :!: :!: :!:

حبيبي هجار حبيبي قامشلو كيفكم ان شالله بخير ..؟ :)

بحكيلكم قصة صارت معي قبل خمس سنين تقريبا ...

طبعا كنت لسا بعز الشباب .. مو مختير ومشيب متل هلا ..قررت اني اطلع برى سوريا .. وبالفعل مشي الحال وطلعت لدولة عربية بس شو دولة يعني تقدر تقول سابقتنا بش خمسين سنه .. من ناحيت التطور ... !!!
خيو بلا طول سيرة .. بعد ما ضليت فترة .. وتعرفت شوي على البلد قلت بروح اقعدلي بش مقهى .. والمقاهي هناك شي خيلة ..المهم رحت على مقهى حلو كثير ديكور وموسيقى .الخ .. طبعا مانا احلا من مقهى كوليلك ..

المهم قعدتلك على طاولة بطل على منظر حلو كثير وحطيتلك رجل على رجل .. بعد ربع ساعة ما اجا الكرسون ..!!!! قلت اكيد زحمة خليني استنى شوي .. 8O

مضت ربع ساعة تانية كمان ما اجى واللي اجو بعدي ... طلباتهم على الطاولة !!!!! :evil: :evil: :evil:

طبعا عصبت كتير ... ليش انا بالذات ما عم يجي لعندي ليشوف الطلبات ...

وثار الدم الفلاحي .... وعصبت وقمت حتى الكل انتبه على تعصبي .. :!: :!:

رحت لعند ... المحاسب وانا معصب .. طلع واحد مصري .. الحمد لله انه عربي لاني تعبان بالانكليزي ..!! المهم حكيتلتو . :!: .. ليش لهلا ما اجى اي واحد من المقهى ليشوف طلبيتي ..؟؟؟؟ :evil: :evil: :evil:

ابتسم شوي بكل هدوء وقال يا استاذ ..( عرفت انه بيقصد بكلمة استاذ شي تاني ) المقهى هون تخدم نفسك بنفسك يعني كل واحد بيجيب الشي اللي بدو ياه وبعدين بيقعد بالمكان اللي بدو ياه ...!!! :? :?

طبعا موقف لا يحسد عليه حطيت ايدي على اذني وشديتها شوي ( كان العقل الباطن عم ينبهني على شي غلط ) وطلعت برى المقهى .... :oops: :oops:

فلذلك حبايبي... اساذ هجار واساذ قامشلو ....ما في داعي تستنو كثير بامكانكم قبل ما تجلسو تاخذو اللي بدكم اياه ... :wink: :arrow:

وهلا باعتبار اني عطيتكم معلومةمهمة كثير بتجيبولي كل واحد كاسة شاي وفنجان قهوة بدون سكر ... :wink: :wink: :)

وشكرا كثير حبيبي قامشلو على الساعة الحلوة ...

ما حكيتلنا عن اخبار التدخين على فكرة ادخل على هل الرابط يمكن يفيدك في اشياء حلوة بتنفعك ... :arrow:
http://www.kulilk.com/kulilk/html/modules.php?name=Forums&file=viewtopic...

وانت حبيبي هجار ... شو اخبار الوقت معك ... !؟؟؟ :?:

اخي العزيز بلند ... بيقولوا من طول الغيبات جاب الغنايم .. وانت بعد الغيبة الطويلة جاي ومستعجل كمان...!!! :evil: :!:

على فكرة في بالمقهى قسم للمطالعة .. فخمة كثير .. لازم تفضي حالك شي يوم لحتى تتعرف على اقسام المقهى كلها .. بعدين المقهى مصمم على الطريقة الفرنسية ...

في قسم خاص للشطرنج .. حلو كثير

بالاضافة للاقسام اللي بتعرفها ...

صحيح شباب بعد بكرة موعدنا مع نسرين لتطرح مسابقتها ..

وما شالله ريبر مطنشنا على الاخر ولا سائل عن حدا هو والجي ... وميسي مشغول كثير وهيما ما عم تطلع من المطبخ ونورا ؟؟؟؟ والبنات كلن صارو باحدث تاريخية والشباب ما عم يطلعو من قسم ادم وحوا ...؟؟؟! :wink: :wink:

وهلا خلونا نشرب فنجان القهوة ...

صباح المحبة زهور كوليلك :oops: ...

...

هاي رح ساوي كاستين شاي :) ... ويلي بدو يشاركني يتفضل عالطاولة :roll: ...
بس لا ينسَ يدفع الحساب بعدين :wink: ...

أوكي حبايبي :P .

هلا حبوبي كيفارا :P .

خلاص معناتو كاسة الشاي صارت من نصيبك شاركني فيها حبيبي :lol: .

أخبار التدخين :roll: , والله مازلت تاركو ,وتقريباً نسيتو لأنو مصر على تركو بسبب تدهور الأحوال الصحية :cry: .

ملاحظة: خلاص حبوبي الخدمة ذاتية بس لا تزعل أوكي حبي :wink: :P .

ونحن ما يطلعلنا كاسة شاي
صارلي يومين ما مريت ع المقهى ......اذا في شي جديد ممكن تخبروني ياه

يعني لايش توصلتن اخر شي .....

عدنا. .. ..

شو شباب راح نقضيها كلها كاسات شاي وقهوة :cry:

وين نسرين لاو. ... . :?

وين مسابقتهاااا. ...

يلا ننتظرها شوي

شو أخ كيفارا وينك . ... .؟؟؟

مرحبا ...

كيفكم شباب ..

هلا حبيبي شفان ... يسلمو على كاسة الشاي بس كانت حلوة كثير مبين حطيت اصبعك فيها ... :wink:

حبيبي هجار شو عم تلاعبنا غميضة تجي شوي وما بقى نشوفك ... :!:

هلا هيما ... وين صايرة عم تغيبي كثير ...

الك احلى كاسة شاي ... على فكرة الطلبات على حساب هجار اليوم ..

ما عليكي الا تجيبي اللي بدك ياه ... :)

شو ابو الميس .. عم تقل حالك علينا صاير ...

بالنسبة لنسرين ..... عم تساوي قصيدة جديدة.... وطلع عندها اخطاء املائية ونحوية كثير ... وهي هلا عم تصلح بالاخطاء لتنزل القصيدة بقسم الشعر لانه بتعرف اذا اخطأ واحد شو بيصير فيه الاعضاء ما بيرحموه ... :wink:

طيب ..اكيد سمعانين..حكمة تقال ببعض المواقف ....

اذ انت اكرمت الكريم ملكته وان انت اكرمت اللئيم تمردا .

شو رايكم بهل الحكمة ... امتى صار معكم موقف تذكرتو فيه هل الحكمة ...؟؟

وشو الحل برايكم ؟؟

وهلا صار بدها كاسة شاي ....ما هيك .. :wink:

مرحبا يا جماعة
كيفكون
..
...
....
شو الظاهر مارح تشربونا شي
هاي اول فوتي الي عالمقهى او اكيد رح بتكون الضيافة مجانية ..هههه
بس في مشكلي!!
انا مابحب لا الساخن او لا البارد بقا شو رح تشربونا
هههه

شكرا كتير كيفارا
على هالمثل
قال بيشو بيزكرك قال
اي كل يوم عم بيتطبق معي هالمثل او خاصةً ازا بدي وصلو بالسيارة لشي محل
لا او شو حاطط بموبايلو جنب اسمي صورة سيارة
يعني سائقو
هههه
ان الله في خلقه شؤون

السلام ع الرجال 8) 8)
قصدي السلام عليكم ، مرحبا للجميع
كيفكون ، شو الاخبار
انا و الله ما بحب الروحة المقاهي بس جيت على طلب اخي كيفارا
بس وينو :roll: :roll:
عزمني و هرب :mrgreen: بيصير هيك كيفارا بتعزمنا و بتروح :evil:
على كل بدي ادفع هلا بس بدي آخود حقا منك كيفارا :mrgreen:
يلا
الى اللقاء

شو رايكم بهل الحكمة ... امتى صار معكم موقف تذكرتو فيه هل الحكمة ...؟؟

أول شي بدنا كاسة شاي :evil: :twisted:

مواقف كتيرة أخي كيفارا . ... .ومتل ما نقول المثل بيبين من عنوانو مااا. ... ..

لناااا عودة. .. . :wink:

اسف كثير اخي gerzan مبين ذكرتك بمواقف مزعجة كثير ..

فعلا يا اخي في كثير ناس بتندم على معاملتك الطيبة معهم وياريت يكون ردهم الك بالخير بالعكس ... بيردولك الياه بالشر والكراهية كانك مساوي جريمة !!!

حبيبي gerzan بامكانك تاخذ اللي بدك ياه على حسابي طلباتك اليوم باعتبار تسببتلك بهزة بدن مزعجة ... :wink: :wink:

هلا بالاخ العزيز ريبر ..

ليش ما بتحب الروحة على المقاهي ...؟؟؟ مفكرها مقهى عادي ما هيك :evil: :evil:

هذا لانك ما عم تجي لتتعرف عليه مشان هيك حكمت عليه غيابيا ... :?
بعدين ما هربت ياخي انت اللي تاخرت ... :cry:

على كلا مافي مشكلة ... المرة الجايا على حسابي كمان بس لا تتاخر :wink: :wink:

حبيبي ميسي ... بانتضار عودتك بس لا تغط متل كل مرة وترجعلي بعد يومين :wink: :wink:

شفتو شلون بردت كاسة الشاي تبعي :cry: :cry: :(

مرحب شباب ......كيفكن 8)

ياريت قازوزة باردة إذا ممكن :)

شو وينو صاحب القهوة السيد كيفارا

صديقي كيفك والله أنا بحبك شو ضيفنا شي على حسابك :lol:

هالمرة على حسابك بس المرة الجاية مو على حسابك أنت بتدفع :P

هالمرة على حسابك بس المرة الجاية مو على حسابك أنت بتدفع :P

هلا حبيبي اكرم ..

خوذ اللي بدك ياه على حسابي بس لا تنسى تدفع قبل ما تطلع.. :wink:

على فكرة اخي المقهى لكل الاعضاء مافي الها صاحب واحد ... الكل صحابها ...

وانت وين هل الغيبة ما عم تجي ؟؟؟

بعدين شو مفكر حالك جاي على عيد الحب حاططلي وردة حمرة وجاي ... :)

وهلا صار بدهلا فنجان قهوة ... ان شالله الحق اشربها سخنة :?

مرحبا يا جماعة الخير

كيف القهوة اليوم

خيو عندي فكرة

لبين ما تجيب نسرين المسابقة

خلي كيفارا يكلف شي واحد بموضوع

ونتناقش فيه

شو رايكن

هلااا بهجار. ... كيفك ولو ؟؟؟

والله القهوة اليوم وسط.. ... ..

أكيد على حساب الأخ كيفارا ما :( :( :( :( :( :(

يلاا نستنا كيفارا