روني علي : Werisê evîndariyê

    • 2016-12-31

     
    Çi evîn e ..
    Werisekî badayî
    Mîna gewdeyê Ejdihayekî
    Ku di binê bîreke bê binî de
    Kevokan vedpincirîne
    Her ku lêvan
    Ji kenê çavên yarê ziwa dikim
    Li gewriya min
    Jiyanê teng dike 
    Û ditengijîne
    Çi evîn e ….
    Çi evîn e
    Nanekî li ser sêla dil e
    Bi bihna sibehê re
    Zimanê birçiyan şil dike
    Rondikên sêwiyan kul dike
    Û di xernaqa demê de
    Karwanê lêpirsînê
    Bê xelat û diyarî .. Bi rê dixe
    Lê ti caran
    Li kavilên sawiran .. Venagerîne
    Çi evîn e ….
    Çi evîn e
    Peyaleke ji meyxaneya xemane
    Ger tu vexwî 
    Bi dîwarên sar û bê deng re
    Dibî dost û rêheval
    Ger venexwî
    Di paşila xewnên kuzirî de
    Limêja dînekî
    Li ber serê miriyên avsaneyan
    Disopînî
    Çi evîn e ….
    Çi evîn e
    Gulmek Av e
    Di sîbera Havînê de
    Bizamara Şewatê
    Ji ser lêvên qelişî
    Dadimale
    Û di henaseya têkçûnê de
    Tîbûna mirinê
    Di pençeyê koça dawîn de
    Telîz dike .. Û dişkîne
    Çi evîn e ….
    Çi evîn e
    Ez û te
    Û hin henaseyên
    Ji rondikên hêviyan 
    Ku di sîngê me de
    Bi dûmana ahînan
    Kostek kirî mane
    Her cara ku ber xwe didin
    Bi nikulê reşbîniyê
    Dilerizin .. Û dicivilin
    Çi evîn e ....
     
    20-12-2016

    روني علي