معقول تخونك الذاكرة وأنت بهالعمر
الخميس, 13/03/2008 - 12:18
معقول تخوننا الذاكرة ونحنا بعز ربيع عمرنا متل ما بيقولو
موقف صار معي من سنة وشوي لحد اليوم مصدومة وكل ما بفكر فيه بستغرب
كنت بعرس مع امي ومبسوطة كتير وبلحظة كنت واقفة مع الصبايا وأمي قاعدة قدامي وعم نتفرج فجأة حدا دق على كتفي مشان أبرم أشوف وفعلا أول ما لفيت لشوف مين شفت صبية فاتحة ايديها وعيونها عم تبرق وابتسامتها معبية وجها وبدها تحضني بكل حرارة ( أنا مصدومة أكيد هاي غلطانة) وفعلا سلمت علي وكيفك وشو أخبارك أنا كنت واثقة أنها غلطانة لولا عم تناديني بأسمي
زادت الصدمة هاي بتعرفني مين ومنين بتعرفني ياربي ساعدني مين هاي
لحالها ذكرت وين صرتي بالدراسة قلتلها آها كنتي معي بالمدرسة مو بتقلي اي كنا ندرس سوا انا بعرف أنك جامعة بس وين وصلتي 8O ( هاي بتعرفني مو من زمان )
بلشت فكر بسرعة شفتها بيضة وعيونها ملونة تذكرت وحدة بالإعدادية كانت هيك وشقرا كمان بس هاي متحجبة :? بكل لطافة قلتلها تذكرتك على اساس هي بس اعتذرت أني نسيانة اسمها وفورا لك أنا هيما ( بسم الله ) والله هاي اول مرة بسمع بهالأسم
اي صح انتي من معبدة صح :) لك لا هاي ضيعتي شو نسيتي 8O يا ربي انا لولا العرس مو سمعانة بهالضيعة أبدا :roll:
موقف محرج كتير مالي غير اسألها متأكدة أنها بتعرفني
كان الجواب صدمة منها شو نسيتي كنا سوا بدورة الفلسفة ودائما بسأل عنك 8O 8O 8O 8O
انا هون اطمنت انو البنت غلطانة لأن أنا علمي وهي عم تحكي عن الفلسفة
قلتلها أكيد هالمرة غلطانة ومشبهتيني بحدا تاني
ولو الظاهر انك دوخانة اليوم .. الاستاذ الفلاني من ديريك حتى كل ما بشوفو بسألو عنك
فرجت :lol:
حبيبتي هاد الاستاذ بيعرفني صح وبيقربني لهيك بيجاوبك بس أنا ما كنت بيوم أدبي
البنت متفاجئة شي مو طبيعي ( شو نسيتي لما اجينا أخدنا كم درس عندكم بالبيت )
حتى امك بتعرفني صحي كيفها
أنا هون بعدت وقلتلها هاي أمي وتفاهمي معها
دغري مرحبا خالة كيفك
أهلين عيني شو هالصدفة هيما مو 8O 8O 8O 8O
أمي ... منين بتعرفيها
اي بعرفها مو هاي أجت لعنا بالعيد آخر عيد قضيناه ببيتنا هداك :roll:
ماما هي بتقول انو كنت معها بدورة الفلسفة
اي شو نسيتي
اي صح فعلا أنا نسيت وهلا تذكرت أنا بكلوريتي أدبي بس شلون هيك مو متذكرة
فجأة اجا على بالي كذا موقف من دورة الفلسفة وتذكرت لقطة للبنت بس اسمها مستحيل
وتذكرت انو كل وقتي بالدورات كنت معها بس ليش هلا ماني متذكرة
اعتذرت منها كتير لأن اكتر موقف محرج واجهتو بحياتي وسألتها عن وحدة كانت دائما معها ومن نفس الضيعة حتى كان اسمها سلوى وصورتها ببالي قالتلي اي بس مو اسمها سلمى ( مشكلة جديدة) اوك هديك شو اخبارها
هاي هي تعي نسلم عليها وما بعرف وقتها بأي اسم نادتها وسلمنا فعلا بس هالبنت اول مرة بشوفها ومستحيل أني شايفتها قبل هلا
حتى التانية اللي على اساس سلوى حسيتها متضايقة مني وانحرجت كتير
يا جماعة أنا بعتذر تغيرت كتير اشيا بحياتي ويظهر اني نسيت قسم منها
هيما مبسوطة فيني ومو مصدقة يا حرام وكلها ثقة
تذكرتي محمود؟؟
مين محمود!!
اخو هاي البنت هو بيعرفك تعي نسلم عليه
أبوس ايدك تركيني من محمود يا دوب تذكرتك
ضحكت وقالتلي معذورة بس المهم أنو جمعتنا الصدفة ولازم نرجع متل أول
أخدت رقمها وأخدت رقمي ولحد اليوم عم حاول اتصل لأسأل عنها ما عم بقدر أقتنع أنو هاي القصة مزبوطة :roll:
بس الغريب
معقول ننسى بهالشكل المرعب
الله يجيرنا
الجمعة, 14/03/2008 - 22:35
#2
كنت أزور صديق لي وكان هذا الصديق قد أجر غرفة لأحد الطلاب من القرى القريبة وخلال زياراتي لهذا الصديق كنت أجد هذا الطالب المستأجر دائما معه بالغرفة فكلنا متقاربين بالأعمار وكنت بسلم عليه وهو يسلم علي وهكذا في كل زيارة
في أحد الأيام طلعت من البيت وأنا عم بمشي بالطريق ما شفتلكون إلا واحد غريب بعمري ما شفتو عم يسلم علي ويسأل عن حالتي وأنا عم فكر مين هاد؟ ومن وين بعرفو؟ بس أنا ما طولت معي وسألتو أنا بعرفك شي؟ الزلمة استغرب قال مو أنت دايماً تجي عالغرفة عند فلان إلي أنا مستأجر عندو
قلتلو أهلاً وسهلا وعملت حالي على أساس تذكرتو بس عبث بعد ما راح الزلمة بطريقو إني كنت اتذكرو عبث لا شكلو ولا اسمو
وباليوم التالي شفت أحد الأصدقاء إلي أنا وياه كنا أحياناً نترافق للذهاب لزيارة ذلك الصديق وقلتلو على الزلمة المجهول فقلي صديق معقول ما تذكرتو ! ولك هاد اسمو فلان بنشوفو دايما عند صديقنا...
--------------------------------------------------------------------
وبالنسبة لعدم التذكر فإنه يرجع للتمدن فكثرة الوجوه التي تمر بك والتلفزيون والكمبيوتر والمشاكل الناتجة عن التمدن كل ذلك يؤدي إلى عدم تذكر الأشخاص العابرين
السبت, 15/03/2008 - 19:22
#3
أهلا ابراهيم , أهلا vivid,
اول شي شكرا لمروركم وتاني شي المشكلة مانها عند تذكر اسم شخص يا أخ ابراهيم
أنا كتبت هالموقف لأن نسيت مرحلة كاملة بحياتي نسيت اشخاص قضيت معهم سنة تقريبا حتى نسيت أني قدمت أدبي حر :?
أما عن سبب عدم التذكر أخي vivid, بعتقد مو هاد هو السبب المقنع الله أعلم ليش لكن كتير مواقف مانها عابرة بننساها لمكن لأن تغيرت حياتنا وواسلوبها تقريبا بشكل جذري وأكيد في اسباب تانية بفضل ما احكيها :|
شكرا لمروركم الكريم
هاي بسيطة كتيرر بالنسبة للموقف الي اندحشت فيه.. كنت ماشي وما شفتلك إلا شب أنا بعرفو بس نسيان اسمو اجا وسلم ومشينا مع بعض وانا بحاول اتذكر اسمو .. وما تذكرت جبت على بالي شي ميت اسم ومامشي الحال.. المصيبة اجا شب تاني انا بعرفو وهو ما بيعرفو بس مصيبتي كبيرة اني كمان نسيان اسمو التاني .. انحطيت بموقف محرج الشب الاول قال ما تعرفني على الاخ .. تعى وعرف هاد على هداك وانت بالاصل نسيانشو اسمون .. بس خلصت حالي بصعوبة .. قلت يا زلمة ما بدها مشورة تعرفوا على بعض صار كل واحد يذكر اسمو وانا تذكرتون
قصتك حلوة ومصيبة إذا الواحد ما تذكر بينحط بموقف صعب شكراً على القصة انسة بيلسان